Mekge ýolundan haja barýan adamlaryň biri sarysuw keseline ýolugypdyr. Kerwendäkiler ol adamdan tamalaryny üzüpdirler. «Beýle
ýagdaýda ýol sökmekligiň derdiň has beterleşmegine eltjekdigine»
göz ýetiren kerwenbaşy çarwa araplar bilen ylalaşyp, ony şol ýerde
goýup gitmegi makul bilipdir. Näsaga derek kerwendäki düýelerden
bermegi ylalaşypdyr.
Olar haj parzlaryny bitirip, yzlaryna dolanypdyrlar. Illerine gelenlerinde ýaňky hassanyň öz öňlerinde sag-aman gezip ýörendigine geň
galypdyrlar. Bu sagdynlygyň sebäbini sorapdyrlar. Ol adam: «Biz şol
ýerden birnäçe parsah uzaklykdaky düşelgelere ýetenimizde, araplar meni özleriniň iň gyradaky öýlerine eltip taşladylar. Yzalaryma
çydap bilmän, janhowluna urunýardym. Şol gün olar bir apy ýylany
awladylar. Kellesini we guýrugyny kesdiler-de, gowrup iýdiler. Men
içimden: «Bular apy etini iýmäge endik edensoňlar, ol et bulara zelel
berýän däldir. Belki men iýerin-de ölerin we bu kösençligimden dynaryn» diýdim. Men olardan şol etden iýdirmegini soradym. Olaryň
401
biri maňa apy tutup, gowrup berdi. Men ony iýip uklapdyryn. Çuňňur
uka batypdyryn. Oýanyp görsem, endam-janym, egin-eşigim, ýorgan-
-düşegim derlemeden ýaňa öl-myžžyk eken. Ýagdaýym ýüz gezekden
hem gowy üýtgäpdir. Irden turup göremde, garnym hem kiçelip, adaty
kaddyna gelipdir. Men araplardan iýer ýaly zat soradym we iýdim.
Sagalandygyma anyk gözüm ýetýänçä, olaryňkyda boldum we soňra
olaryň käbiri bilen ýola düşüp, Kufä geldim. Asyl, apy ýylanyň eti
sarysuw keseliniň bire-bir emi eken» diýipdir. Soňra ýoldaşlaryna garap: «Meniň bu ahwalatym başga bir hakykaty ýadyma saldy. Aglaba
halatda biziň gorkýan, dowla düşýän we gaçýan zadymyz derdimize
bire-bir derman bolup çykýar. Şonuň üçin bu zatlara çuňňur düşünmek
gerek. Islendik dünýewi maksada ýetmek babatda hem bu düşünje
mundan buýana meniň ýörelgäm bolar» diýipdir.