Adam ogly
seniň gara başyňdan
Näçe jepa,
näçe jebir
dert geçdi?
Bilýäňmi,
Zeminde ilkinji gezek
Haçan adam adam bilen tersleşdi?

Esgi ýaly sal-sal dünýäň üstünden
Näçe namart geçdi,
näçe mert geçdi?
Bilýäňmi,
nämäniň üstünde ilki
Adam ogly adam bilen tersleşdi?

Adam bilen Howaň behiştden kowlup,
Zeminiň üstüne gaçandan bäri,
Bir ataň,
Bir enäň sansyz zürýady
Bir-birine ýagy haçandan bäri?

Şu sowal
gijeler kellämiň için
burowlaýar tüweleý dek pyrlanyp.
Tutuş adamzadyň akly
bolmanda
Gördümikä ýeke gezek durlanyp?
Adamlar gyrlyşsa,
tüýsün üýtgedip,
Tebigatam durkun bozup başlaýa.
Asyrboýy ýatan garyn eredip,
Daglaryň depesin ýalaňaçlaýar.

Taşlaýar suw harsaň-harsaň daşlary
Edil depesinden bu asy Ýeriň.
Haçan bir-birege çytyp gaşlaryn,
Adamlar tersleşdi?
Jogabyn beriň.

Atamyrat Atabaýew