Käşgä gidip bolsa...
Dumany taşlap,
Amany taşlap,
Köňle gelenin taraşlaman,
Garaşman,
Gözüňe urlan ýaly,
Hokgabaz,
Darbaz bolup,
Perwana kimin,
Özüň urup gyzyl oda,
Garaňkydyr öýden dünýäňde
Şöhle saçsaň,
Çöller bilen söhbet açsaň,
Guşlar bilen uçup ýörseň,
Keýik bilen, maral bilen
Sähralarda göçüp ýörseň,
Öz-özüňden geçip ýörseň,
Öz-özüňden gaçyp görseň,
Öwüsende sergin şemal
Gursagyňy açyp görseň,
Ýyldyzlar deý ýanyp görseň,
Ýyldyzlar deý öçüp görseň,
Hiç kim bilmese öçenňi
Ýa soňky syry açanňy,
Ynam bilen...
Yhlasyňy garyp ýörseň,
Yşk oduny dörüp ýörseň,
Gözlegne çyk jöwahyryň
Öz dünýäňi garyp görseň,
Içinden näme çykarka
Ýüregiňi ýaryp görseň,
Bägüle daşdan garaman,
Jigerine girip görseň,
Ikatýok bilen aglaşyp,
Itler bilen üýrüp görseň,
Ömür saparda bolsaňam,
Öz duluňda süýnüp ölseň,
Seniň başga armanyň ne
Öz süýegňi süýräp ýörseň.
Bäşlik bormy bahalaryň
Durmuş mydam synap ýörse,
Gynanmaly bormy, eýse,
Ykbal käte gynap görse?!.

... Men güllere içim dökdüm
Olar gara gan boldular.
Ho-ol daglara arzym aýtdym
Daglar wes-weýran boldular.
Ummanlara syrym aýtdym
Ummanlar haýran boldular.
Harabada aglamyşam,
Olar köşk-eýwan boldular,
Çal küller heýjan boldular.
Ekdim çigildem tohumyn
Çägeler güldan boldular,
Damjalar umman boldular,
Juda mähriban boldular.

Käşgä gitmän bolsa...
Ummany taşlap...

Şonda göwräň ak baýdakly gaýyga
münüp o kenara ugramagynyň
manysam bolmaz.

Suraý BABANYÝAZOWA.