Pula ýüzýär wyždan sa:ly
Tiz baýamak ynsan bary
Ynsaby ýuwudan bizdik
Aýt, döwürde günä barmy

Bugün Gurban, erte Çary
Bugün Gyzyl, erte Sary
Söýgüni guradan bizdik,
Aýt, döwürde günä barmy?!

Nirä barýar edep ha:ly
On sözüňem sögünç ýary
Edebi unudan bizdik,
Aýt, döwürde günä barmy?!

Gussa çümdi ýaşlaň aňy
"Tüssä" çümdi ýaşlaň aňy
Bolany döreden bizdik,
Aýt, döwürde günä barmy?!

Bilinmez hiç ýüzde a:ly
Kalpda şeýtan, dilde kary
Ýalany ýöreden bizdik
Aýt, döwürde günä barmy?!

Nirä barar bulaň çägi?
Düzetmegiň ýokmy täri?
Döwüri özgerden bizdik
(Düzetjegem biz bolmaly!)
Aýt, döwürde günä barmy?!


Ylham GURBANALYÝEW