Ýaradar kalpdan çykan
Iňňildi deý horjaýam.
Boýçy çöp ýaly dünýäň
Gulagyny gorjaýam.

Jigerim – balykgulak –
Eplem-büklem Saturn.
Bir görseň-ä, ah ýaly,
Bir görseňem, ruh ýaly
Samrap ýanyp otyryn.

Wagşy agra çydaman
Dişden syzan gülki men.
Zeminiň bükgüldisi,
Çuwalyň jukguldysy,
Aşyk-magşuk hulky men.

Terkidünýä takadam,
Ters aýlanýan sagadam,
Herne terse tutýaryn.
Sulbam sallam-sajagam
Kölegesi deý gussanyň.
Meňzäp betbagt ýazgyda
Barýaryn bedroý garrap.
Dünýe syryn ýazdy-da
Zyňdy meni myjarlap…

Ümlük ýaly duýgudar,
Iňňildi deý horjaýam.
Zamana möhrün goýan –
Peşehordaýam!

1978 ý.


Nobatguly Rejebow