Men döwtalap däldim kalbyň gyrmaga,
Ilgezikdim bagt bermäge egsilmez.
Höwesjeňlik edip göwnüň görmäge,
Öz göwnümi zyňdym, diýip: “Degsinler!”

Başarşymça yhlas etdim ugruňda
Hem öçürdim öz nebsimiň közüni.
Goltgy tapyp şahyrlaryň şygryndan,
Senli derde ýokuşdyrdym özümi.

Kesp edindim guwanmagy keseden,
Her göremde monça boldum, eseldim.
Boýçy çyksa buza dönen käseden,
“Şol geler”-li umytlarda kösendim.

Ejizländir diýdiň,
Ejizdir diýdiň
Elden gelýän zadym diňe ýazmakka.
Hemem “Söýgiň odam ezizdir” diýdiň.
Ah, ýanmak bar, ýanmak bar...


Sapa HOMMADOW

“Barsaň, “döwran ötdi” diýgil daglara.”
(“Görogly” eposyndan)

Köňlümden syzylyp çykan, eý, goşgym,
“Barsaň, “döwran ötdi” diýgil daglara.”
“Örtedi, örtendi, emma ki yşkyn
Başyna täç etdi” diýgil daglara.

“Özün aýamady, çekdi ah baryn,
Diňe maňa diýip bildi ahwalyn,
Arzuwy gezmekdi arşy, asmany,
Onsam çüte bitdi” diýgil daglara.

“Deňizde gulaçlap, ýeňip tolkuny,
Ýaşajakdy yşkdan ýasap ýelkeni.
Zer kimin lowurdap, seçip ýalkymy
gezjek ýanar o:tdy...” diýgil daglara.

“Ýellere harpyk deý sowruldy” diý sen,
“Söýgüde armanly gowruldy” diý sen,
“Maksady ullakan oglandy” diý sen,
“Şatlyk hem hesretdi” diýgil daglara.

“Aý kimin arzyly, Gün deý ýagtydy,
Arzuwçyldy... Hyýallary tagtydy,
Behişti gözeliň duşjak bagtydy,
Bagtydy...
Bagtdy!” diýgil daglara.


Sapa HOMMADOW

Asyl-asyl boldy-da bir agyr ýük,
Kalby ýere garşy sozdy, ine-de.
Arzuw syýam bilen ýazan geljegmiň
Hatlaryny ykbal pozdy ýene-de.

Ýagmalanyp şirin-şeker gijeler,
Düýşler talanyldy, umyt şel açdy.
Yşk bolup ýaşalan köňül köşgüniň
Gapysyny bir del ýapdy, ýel açdy.

Wagt ýöremez bolup galdy şondan soň,
Sekuntlary barmak basyp sanadym.
Setirlere ruhum bilen siňdim-de,
Dyrmalanan ýara bolup ganadym.

Başym sämäp hijriň derdinden ötri,
Yşnagymda nam-nyşan ýok diriden.
Sözläň, eý betbagt duýgulam,
Öňki
özümi men gözlemeli nireden?


Sapa HOMMADOW

Ýollar meni alyp gider,
Dözer gider ýyllar maňa.
Ýürek ýanar ot içinde,
Üşeýänler ýylnar maňa.

Daga-daşa siňer ahym,
Hasratymy diňlär asman.
Syrlarymy alan baglar
Meni ryswa etmez asla...

Armanymy bagra basan
Otagyma gysylaryn.
Joşa gelen ýaz ýagşy deý
Ahyr bir gün kesilerin.

Giderin gelinmez ýere,
Ýatlanaryn, aglanaryn.
Ýöne, mümkin, mazarymda
Ot alaryn, daglanaryn.

Ökündirer ýaýdançlarym,
Ahmyra ýugrar tesmelem.
Direlmek islärin gaýta,
Bolmasa-da ol islegim...


Sapa HOMMADOW

Hemmesini bir bada paýlaşaýyn diýdiň öýtýän, dowamly bolsun, Galamyň taçilkalap, dynsaň ýene täze al. Täze goşgulaňňa garaşýan

Sözläň, eý betbagt duýgulam,
Öňki
özümi men gözlemeli nireden?

Gowy jemleme

Tüweleme.

Tekstiň içinde getirseň düşündirip bilmegim ahmal.

Ol reper eýranly türkmen öýdýän. Arassa däl oň dili. Ýa dini sözdür, ýa parsy sözdür ol.