GAZ UÇDY, GARGA GONDY

Kyblagähim, Watanym,
Saňa diýjek sözüm bar.
Ýaşasam-da goýnuňda,
Boldum bu gün saňa zar.

Ýekirlende seň diliň,
Çykmadymmy howandar?
Mertebesin öz iliň
Goramasaň niçik bor?

Garaşsyzlyk isledim
Men saňa, Ata Mekan.
Eýsem, muny ýürekden
Küýsemedik barmykan?

Geçdi gitdi ol günler,
Kim ýük boldy, kim ýükçi.
Toý gutardy. Çar ýandan
Üýşdi soňra tüýdükçi.

Suw getiren kimsedi,
Kimse-de küýze döwen.
Suwy başyna çekdi
Küýze döwenler bu gün.

Märekede danalaň
Orny boldy çet indi.
Haýp, kimler öňe düşdi,
Kimler gyra çekildi...

Kimleň çyrasy ýandy,
Kimleň çyrasy söndi.
Bu sonarly meýdandan
Gaz uçdy, garga gondy.