Ýene-de sensizlik düýnämi gurşan
Ýene-de birmeňzeş günleriň bary.
Ähli süýjilikleň tagamy turşan,
Yssyda undulan çekize ýaly.

Ýene-de şol güller süllerip otyr,
Ýene-de şol guşlar uçanok erkin.
Ruhym hereketsiz bedende ýatyr,
Gulagyma gelýän seslerem çirkin.

Ýene-de kejirlik öz işin edýär,
Ýene-de bakyşlam - bakyşy hassaň
Şatlygam her güni yzyna gidýär,
It deý üýrüp duran sesinden - gussaň

Emma, hiçisi-de bolmaz bakylyk
Bu zatlaram geçer-gider teý-ahyr
Şatlygy-da ýetip barar çakylyk,
Gussalary kowup, etsem tagapyl
Guşlar erkin uçup, hoşowaz saýrar
Ýylgyryp duranja bakyşym bolar
Güller görki bilen bar ýere yaýrar
Ylhamly bedenim aýaga galar
Ähli turşylara tapylar çäre,
Ajy ýatlamanam iýjek bal çalyp...

Hemmesi öz ornun taparam, ýöne
Bu ömürde sensiz gezjegim anyk...


Ylham GURBANALYÝEW