Pul bilen çözüp bolmaýan meseläni, köp pul bilen çözüp bolýar. Hemişe bolşy ýaly döwrebap futbolda-da "agzy gyşygam bolsa baýyň ogly geplesin" diýen nakyl henizem trentde. Häzirki zaman dünýä futbolynyň iň gowy futbolçysy (Ronalduň we Messiň janköýerlerinden ötünç soramak bilen) Kilian Mbapbe özüniň fantastik karýerasyny öz eli bilen öldürmegini dowam edýär. Ol ýakynda özüniň PSJ-da galýanlygyny, 3 ýyllyk şertnama gol çekenligini, PSJ-niň täze "proýektiniň" esasy bölegidini yglan etdi. Özüniň Real bilen hiç hili ylalaşyk geçirmänligini, iň soňky pursata çenli PSJ-dan ýüz öwürmänligini, PSJ-da galmak kararyny ilki bilen jaň edip Realyň prezidentine aýdanlygyny köpçülige mälim etdi. Şu ýerde bir sorag ýüze çykýar: Eger Real bilen hiç hili ylalaşyk ýok bolsa onda Florentina daýa jaň etmek nämä gerek? Mbapbe özüni pul gyzyklandyrmaýandygyny, Realam oňa şunça pul berip biljekdigini aýratyn belledi. Fransiýa metbugaty bolsa oň pul üçin Parijde galmanlygy barada onlarça sebäpleri getirmegi dowam edýär. Göýä onuň inisi ondan Parijde galmagy haýyş edipdir, mähriban agasy oňa ýok diýip bilmändir. Ýene bir wersiýa, Real superliga gatnaşsa ýewrokuboklardan kowular, Mbapbe bolsa liga çempiony almagy arzuw edýär. Bu diňe oň karary däl, eýsem onuň agenti, ýagny kakasy, onuň şertnama şertlerine goşulyşyp gezýän ejesiniňem karary. Olar öz çagalaryna diňe gowulyk isleýändigi düşnükli zat. Ýöne futbolda öz işiniň ussady professional agentlerem bar. "Serçe soýsada gassap soýsun" diýlişi ýaly ata-enesi Mbapbeň transfer işlerini şolara tabşyryp özleri futbol taryhyndaky iň meşhur futbolçy bolup biljek perzendine daşyndan guwanyp oturany gowumyka diýýän. Taryhda Reala geçmäge razylyk bermedik futbolçylar bar. Ýöne olar legenda, olar Realyň köp aýlykly, ýokary girdejili teklibinden ýüz öwrüp, ujypsyz aýlyk bilenem bolsa öz söýgili toparlarynyň üstünligi üçin oýnadylar. Buffon, Totti, Jerard bular başga taryh, Realyň millionlaryndan ýüz öwrüp wepalylygy saýlan ýigitler. Mbapbe bolsa, PSJ-dan kosmiki şertnama teklibini almak üçin (PSJ-da galmagy üçin 300 million ýewro, ýylyna 100 million ýewro, jemi 3 ýylda 600 million ýewro, bonuslar bilen 1 milliarda golaý) özüniň çagalykdan iň söýgili kluby Realy soňuna çenli ulandy.
Nirde oýnamak bu futbolçynyň professional karary, ýöne futbol taryhynyň iň gowusy bolup biljek talantyň göz öňümizde ýitip barýany gynandyryjy. Ol bu ýyl Fransiýa çempionatynyň bombardiri boldy. Ýöne muny kim agzaýar, hiç kim. Iň güýçlidigiňi dünýäniň iň abraýly, iň çekeleşikli, iň meşhur çempionatynda (La liga, APL) özüňi görkezip ykrar etdirip bolýar, biçäre Metsiň derwezesine het-trik edeniň bilen däl...