Sähel salym görünmesem ideýän
Şeýle bir durumsyz dost gerek maña.
Ýanymdaka göwni hoşal şadyýan,
Irmejek, irimsiz dost gerek maña.

Duýgy meñzeş pikri gabat gelişen,'
Göwnümdäkä düşünmäge çalyşan,
Çöregni däl, ýüregini bölüşen,
Gursagy gurumsyz dost gerek maña.

Hökmany däl boý meñzeşlik boýuma,
Islän wagty gelip bilýän öýüme,
Garaşdyryp boýçy bolman çaýyma,
Ýoluna garamsyz dost gerek maña.

Orun bermän, oýlaşdyrman her kesi,
Saklap bilýän, saklanylýan sarpasy,
Özümkiden has goýazy paýhasy,
Gepde söz ýarymsyz dost gerek maña.

Bölüneñsoñ bir göwreden bir öýden,
Dogandan ýakynyñ bolarmy heý-dem,
Şoña-da aýtmajak syrymy aýdan,
Dogana berimsiz dost gerek maña.

Bolaýyn şat günde, bolaýyn kynda,
Ýalñyzlyk derdini dep etjek mende,
Ondan bezikmesem görsem-de günde,
Görmesen aramsyz dost gerek maña.

Ýaraly ýüregme em bolup dañjak,
Dirilik suw bolup dodagma damjak,
Soñky pursat keşbi gözümde doñjak,
Hoşlaşman ugramsyz dost gerek maña