Biperwaýlyk süýşüp ýakyn gelende,
Köpbilmiş köpelip,
Bilýän azalar.
Tapawut kiçelip çynda, ýalanda,
Olary saýgarjak bolýan azalar.
Garym-gatym bolar sähet, bisähet,
Okumyş bol bolar,
Çyn alym — gahat,
Iliň arasynda öwüt-nesihat
Berýän köpeler-de,
Alýan azalar.
Her kim öňe oklar hergiz bir özün,
Jahyllar-juwanlar tanamaz yzyn,
Aksakgal aşyk dek oýnadar özün,
Paýhasyna tagzym kylýan azalar.
Birine ýetmese ýüz maksat tutan —
Hany, razy bolup dünýäden öten?
Özgelerden aýyp gözlär öňýeten,
Öz aýbyny özi bilýän azalar.
Aýdylýan aýdymlar goşulmaz saza,
Gadyr-hormat gaçar tagama-duza,
Döwür öňe gider,
Adamam — yza.
Emma muňa nazar salýan azalar.