Biziň ärsarynyň goç ýigitlerniň
Her zaman başy jem boldugy bardyr
Mejlis içre gülgün şeraplar içip,
Şady-horram oýnap güldügi bardyr.
Türpe edeplidir otursa-tursa,
Bary gulak goýar, biri gep ursa,
Her ýerde özünden ulyny görse,
Onuň gadryn ýagşy bildigi bardyr.
Ýagşysy, ýamany aýly-saýlydyr,
Ata çyksa, ýaraglydyr, şaýlydyr,
Guýma sagdyk, ispyhany ýaýlydyr,
Görenler haýrana galdygy bardyr.
Goçaklar döwtalap dursa meýdanda,
Gaýry muhannesler hiç bolmaz sand
At ýykylyp, ýoldaş galsa meýdanda,
Dönüp-dönüp naýza saldygy bardyr.
Algyr guş dek sagy-soluna bakyp,
Günde at oýnadyp, meýdana çykyp.
Kanda ganym görse, atyndan ýykyp,
Golun baglap, alyp geldigi bardyr.