Daşymdan guwanyp synlap oturan,
Ýürek tarlarymy sazlap oturan,
Gara saçlarymy sypap oturan,
Şumahal ýanymda ejem bolsady.

Ne hyýal,küýde men bilerim ýaly,
Mundanam has bagtly bolarym ýaly,
Bölüp ýüregimi bererim ýaly,
Ýanymda şumahal ejem bolsady.

Görünmezdi dünýe beýle dar bolup,
Mährinden erärdim dagda gar bolup,
Otyryn men bir hoş söze zar bolup,
Şumahal ýanymda ejem bolsady.

Aý howlugýar gökden ýere düşmäge ,
Heý , umyt barmyka saňa duşmaga,
Ýene birje gezek derdinişmäge,
Ýanymda şumahal ejem bolsady.

Sadaja göwnüni awlarym ýaly,
Ne derdi bar eken, aňlarym ýaly,
Boýnundan gujaklap aglarym ýaly ,
Şumahal ýanymda ejem bolsady.
Ýanymda şumahal ejem bolsady...