Sen maňa nazar sal ýekeje gezek,
Şol gezekde gözleriňde galaýyn.
Şol ýekeje gezek ömürlik gerek,
Şonuň üçin gözleriňde galaýyn.

Şaýat bolsun şoňa sähralar-düzler,
Şaýat bolsun şoňa baharlar-ýazlar,
Daşyňda perwana bolanda gyzlar,
Bakmaz ýaly gözleriňde galaýyn.

Tümlükler gaplanda aýyň jemalyn,
Saçyň sypalanda bahar şemalyn,
Birden aýra düşse,seniň ykbalyň,
Ýaşlar ýaly gözleriňde galaýyn.

Kyn güne düşemde meni goldara,
Seni ýatlap ejiz göwnüm aldara,
Göwün berseň,menden özge dildara,
Ýaşlar ýaly gözleriňde galaýyn.

Bir nyşanjyk alyp galaýyn senden,
Takdyr terse ýazyp aýyrsa menden,
Salam ýollar ýaly aman-esenden,
Çekip zaryn gözleriňde galaýyn.

Gülnabat Akyýewa.