MILLI GALKYNYŞ

Galkynmajak millet, galkynmajak ýurt,
Milli galkynyş diýip ýaryş geçirýär.
Mes hojaýyn konýak guýup özüne,
Gullaryna bolsa kasam içirýär.

Wah kyrk emjegem däl, kyrk sany emzik,
Sorup-sokjap halkyň içi ýellendi.
Diňe biri hasyl boldy wadalaň,
Türkmen dogrudanam dünýä bellendi.

Türkmen metgi boldy, masgara boldy,
Tagta günde tans oýnady ýalaňaç.
Ýüzün ýapyp tükge düşdi sungaty,
Edebiýat başyna orady gyňaç.

Petde-petde goşgy, weşeň-weşeň saz,
Heýkeller öwrüldi gyryň daşyna.
Büküldi, egrildi şahyrlaň bili,
Meňzäp küntüň oýnap duran gaşyna.

Bir topar bihaýaň tapan bu oýnun,
Il-gün dälde, il-günsüzler oňlamyş.
Bu täze hokganyň hakyky ady,
Milli galkynyş däl, şahsy ommalyş.


Şiraly NURMYRADOW