RUBAGYLAR

Jahan syryn yzlan bu ters oýunda
Byrag müner, arşa galar küýünde.
Özüniň kimdigin aňşyran çagy,
Boýnun burup, galar ahmyr öýünde.

* * *
Arman, düşdük bikär, bir biweç ýola,
Pelek saldy bizi oýnatgy hala.
Göz açyp­ýumynçak geçdi ömrümiz,
Terk etdik dünýäni, ýetmän wysala.

* * *
Gowgaly bu älem gadym diýardyr,
Gündizi röwşendir, gije gubardyr.
Synlandyr ol kesbin ýüzläp Jemşidiň,
Ýene ýüzläp Bährem ýadynda bardyr.

* * *
Peşmege dönderse takdyryň bu gün,
Togarlanybergin, etmegin göwün.
Seni şeýle hala salan bilýändir,
Kän gowy bilýändir durmuşyň towun.

* * *
Dünýäniň özeni, joşy — özümiz,
Paýhas atly mähek daşy — özümiz.
Meňzetsek ýüzüge älemiň ýüzün,
Şol ýüzügiň göwher gaşy — özümiz.

* * *
Danalar bilsek diýp dünýäniň syryn,
Yzlady ýodasyn asmanyň, ýeriň.
Soňam ýol­ýodany ýitirip olar,
Awy boldy tümlük diýlen ýeseriň.

* * *
Bihabar men. Bilmen baryň ýa ýoguň,
Zerurmydyr saňa günäm, sogabym?
Günäm ýetik. Şonda­da men tamakin
Rehmetiňden seniň, eý, Biribarym!

* * *
Damar, süňk, et, gandan bolupsyň berjaý.
Gezibergin, bardyr ýaratgan Hudaý.
Rüstem Zal bolsa­da, burma boýnuňy,
Gep çekme, dostuňam bolsa Hatam Taý.

* * *
Dostluk — döwlet, tämizligiň gözbaşy,
Çyn dostuň aýagna goýýaryn başy.
Gam tygyn atsa­da, dost atsyn, geçir,
Her ki zadyň dostdan geleni ýagşy.

* * *
Säher çagy bir guş gördüm düýşümde,
Keýkowsuň kellesi onuň gaşynda.
«Toba, toba! — diýdi guş bakyp oňa —
Gör, niçik gowga bar adam başynda».

* * *
Halym pes. Kalbymda Ezraýyl otyr,
Ölenler ozdurdy — parahat ýatyr.
Toba gelýän. Ýene gazanýan günä,
Düzelmezmikäm diýp, edýän howatyr.

* * *
Ägä bol, panynyň agysy bardyr,
Ok­ýaýy, hanjary — barysy bardyr.
Seň agzyňa halwa salsa takdyryň,
Zynhar, ýuwdaýmagyn, awusy bardyr.

* * *
Derwüş geçen ýoldan ýörmeseň, bolmaz,
Ýüzüň ýaşa ýuwup durmasaň, bolmaz.
Baş çykarjak bolsaň ýeser söwdadan,
Serden geçip, kän ah urmasaň, bolmaz.

* * *
Sypma ýok dünýäniň hile­alyndan,
Ömrüm boýy nadyl boldum halymdan.
Näçe öwrensem­de ynsan takdyryn,
Asgyn geldim dünýe diýlen zalymdan.

Omar HAÝÝAM

Terjime eden: Annaly BERDIÝEW