***

Uzakda bir ýerde oduň ýylysy.
Uzakda bir ýerde yşyk görünýär.
Üşeýän kalp ýylarmy?
Garaňky jaý ýagtylarmy?
Bilemok.
Umyt bar hernä.

Sergezdan hyýallaň yzyna düşüp,
Bir gülälek göwnüň kakyp gapysyn.
Ýanyp dowzahyň däl,
Gözleň oduna
Kaknus deý täzeden döräp, köşeşip
bolarmy?
Bilemok.
Umyt bar hernä.

Ýürek bir zatlara gyýylýar hemem
Aglaýar şu günüň, ertäň agysyn.
Ýele giden günler gaýdyp gelermi?
Ýele giden ýyllar gaýdyp gelermi?
Daň atyp gelýär!
Umyt bar hernä.

Eşiklerim sal-sal, saçym bulaşyk,
Däliräp ýollara çykaryn öýtdüm.
Täzeje penjejik alyp berdiler,
Geýmäge çekindim.
Ýokaryn öýtdüm.
Göwünlik berdiler.
Umyt bar hernä.

Ýylgyryşlar ýaşamaga hemaýat.
Duýgy doly göreçleri boýladym.
Ýüzüme urmady ýüze sylanlam.
Diýmek, şindem azam bolsa,
Umyt bar.

Maksatmyrat Çaryýew