DOGA

Merýem ene, bakyp nurana keşbe,
Minnetdarlyk bilen çokunamok men.
Ýa halas et diýip meni söweşde,
Ýa-da toba edip, ökünemok men.

Kalbym boşap, gezip ýörsem-de ygyp,
Medet ber diýip haraý islämok senden.
Bu sowuk dünýämi ýyladan gyzyň
Päkize kalbynyň dogaçysy men.

Berewer özüne ylaýyk bagty,
Gözünden salmajak baky hemra ber.
Garrylygy rahat, ýaşlygy ýagty,
Ýürekden umydyn eýleme kemter.

Ýa gije, ýa gündiz kaza dolmaga
Çen bolup, şol müddet gelse golaýlap.
Iber, oň ajaýyp ruhun almaga,
Perişdeleň iň bir oňadyn saýlap.

***

Aýra düşdük, ýöne keşbiňi seniň,
Gursakda saklaýan ömür ýitirmän.
Geçen şat ýyllaryň salgymy deýin,
Ol meniň kalbyma şatlyk getirýär.

Hiç undup bilemok şu günlere çen,
Täze duýgulardan alsam-da men paý.
Sebäp, taşlansa-da metjit metjitdir,
Harlansa-da ýene Hudaýdyr Hudaý.

M. LERMONTOW

Terjime eden: A. Atabaýew