Synyp barar men.

Sözle pelek, meni neçün gynar sen?
Bu gün gaýgy içre, synyp barar men.
Maña dalda bolmaz, seretsem hiç kim,
Bu gün gaýgy içre, synyp barar men.

Syrdaşym diýenim, syrym açypdyr,
Masgara eýleýip, ýyrak gaçypdyr,
Tapa bilmen, ýa - ha göge uçupdyr,
Bu gün gaýgy içre, synyp barar men.

Söwdügime ýete bilmän, har oldum,
Didelerni, bir görmäge, zar oldum,
Ýyglaý - ýyglaý, ajy sesli, tar oldum,
Bu gün gaýgy içre, synyp barar men.

Gursagymda, gürsüldäp urýan ýürek,
Bu gidişde, tiz ara dursa gerek,
Bagt ummanyn eçil, ber gaýyk - kürek,
Bu gün gaýgy içre, synyp barar men.

Şirnazar diýr, kimdigime Hak güwä,
Asla tüýkürmedim, içem soñ suwa,
Many saça bilmen, kemelen nowa¹,
Bu gün gaýgy içre, synyp barar men.

Şirnazar Taganow

1.Nowa - akyl, paýhas, añ.