Gardaşlar,gün-günden beter bolupdyr,
Ýyl-ýyldan bethatlar gelse gerekdir.
Hamr içen-u,zyna kylan jahanda
Belli meşhur bolup dursa gerekdir.

Musulman gardaşlar,dönmäň bu yoldan,
Geçer siz syratdan,inçedir gyldan
Deçjal geler diýrler birnaçe ýyldan
Äleme bir gowga salsa gerekdir!

Gözi birdir,gara geýmiş kaddyna,
Garyp ýanar haramynyňoduna,
Şam,Şerif-u,Rma,Mekgä,Medinä,
Musulmanlar gaçyp dolsa gerekdir.

Isa,Mäti gelse adyldyr,zatdyr,
Ýajuş,majüş gelse zulum haýhatdyr.
Gulagy ýer südrär,bir ýowuz zatdyr.
Kap dagyn deşip gelse gerekdir.

Galam titrär,ýetimleriň zaryndan,
Joşgun geçer aşyklaryň serinden
Gök öwrülip,daglar sarsar ýerinden,
Ysrapyl suruny çalsa gerekdir.

Derýalar gurarlar,suwlar çekiler
Aý-gün hem tutular,ýyldyz döküler.
Beýik daglar erär,ýer-gök ýykylar
Ýalňyz Möwlam özi galsa gerekdir.

Ajal gelse bende hany-manydan,
El üzer il-günden,şirin janyndan.
Allanyň emrinden,hak permanyndan
Ezraýyl öz janyn alsa gerekdir.

Hakdan gaýry janly-jandar galynmaz.
Ysrapyl jan tabşyr,suram çalynmaz,
Kyrk gün ýagmyr ýagar,ýer-gök bilinmez,
Ýaňadan gögerip galsa gerekdir.

Bir byragy hülle bilen bezärler,
Altyn,kümüş,gyzyl,ýaşyl düzerler.
Dört perişde dirilibän gezerler.
Muhammet gabryna gelse gerekdir.

Seda çykar perişdänin perinden,
"Lepbeý" diýip,turup geler ýerinden
Gabyr ýarylar,gum döküler serinden,
"Waý,ymmatym!"diýip,galsa gerekdir.

Köňül gaýga düşer,magşar gamyndan,
"Hany ymmatym?!" diýip,sorar eminden,
Başyn seždä goýar,galmaz zeminden,
"Gal!" diýip Hakdan ylham bolsa gerekdir.

Ysrapyl suruny alar goluna,
Gözün diker Kadyr Hakyň ýoluna,
Şygyr seda çeker sagy-soluna,
Jümle jandar jana gelse gerekdir.

Asgyrşyp,asgyrşyp görden çykarlar,
Turarlar,asmana gözün dikerler.
Boýurganşyp degre-daşa bakarlar,
Kyrk gün haýran bolup dursa gerekdir.

Görerler,gurt-guşlar gaçmaz ýanyndan,
Derýalar gyzdyryp gelmiş şanyndan,
Her kimse öz söwdüginiň ýanyndan,
Bile hemdem bolup gopsa gerekdir.

Zybanyýa melekler gürzini tutmyş,
Terezi gurulmyş,gün nury gitmiş.
At beren byrag müner don yhsan etmiş.
Dony hülle bolup gelse gerekdir.

Beýik diwan gurlar,bir iş düzüler,
Gün ýüzi çöwrüler,älem gyzylar,
Beýniň çugur-çugur gaýnap syzylar,
Beren nanyň saýa bolsa gerekdir.

Fyrgun,Haman,Şetdat,niçe kapyrlar,
"Ölüpdik" diýip,haýran bolup durarlar.
"Bizi kim direltdi?!"diýip sorarlar,
Mömin gullar jogap berse gerekdir.

Şatlyklary gaýgy bile dep bolar,
Ot çakylar,gowgalary köp bolar,
Ahyrynda ýüz ýigrimi sap bolar,
On iki guruh edip sürse gerekdir.

Bir guruhy hynzyr bolup gezerler,
Bur guruhy maýmyn bolup azarlar,
Bir guruhy kör,ker bolup gezerler,
Etmişi alnyna gelse gerekdir.

Kimsäniň teninde ot-ýalyn oýnar,
Kimsäniň agzynda gan-iriň gaýnar,
Amalsyz mollalar dillerin çeýnär,
Ony Rebbim şeýle kylsa gerekdir.

Kimse ot-tammana jöwrener öter,
Kimse mes bolup ýykylar ýatar,
Kimsäniň aýagy alnynda biter,
Başy bilen ýüwrüp gelse gerekdir.

On gat gyzgyn düşek düşer ornuna,
Nowhageriň başy düşer burnuna,
Dili süýner,düşer,ýeter garnyna
Amalna çolaşyp galsa gerekdir.

Mömin perman bolar,kapyr iç egser,
Ner,bugra bilekli ýylanlar towsar,
Halaýyk aglaşar,permanyna yegser,
Muhammet tuguny gursa gerekdir.

Gorky düşer pygamberler janyna,
Ogul gelmez atasynyň ýanyna,
Muhammet başlaýyp mizan düýbine,
Ýaşyl alam gurup dursa gerekdir.

Gujaklar "Oglum" diyip adam pygamber,
Ybraýym halyl diyr:"Eý,Ýa Biribar!"
Musa,Isa aýdar:"Ýaradan Jepbar!"
Her kim özün diläp alsa gerekdir.

Niçe pygamberler dogasy makbul,
Ne sagyny tanyr,ne soluny ol,
Başyn açyp aglar Muhammet resul,
"Waý ymmatym!"diýip dursa gerekdir.

Halaýyklar sylmaz gözde yaşyny,
Tanyşlar soraşmaz kowum-gardaşyny,
Meýdanda gurulan mizan başyny,
Ysrapyl tutuban dursa gerekdir.

Kapyry bezärler ataş donuna,
Sürerler,elterler dowzah ýanyna,
Palanly gatyr dek bolup şanyna,
Bugra boýun möýler soksa gerekdir.

"Haraý"diýer,yetişmez kimse haraýy,
Eşek dek aňňyryp doldyr saraýy,
Iýmişi zäherdir,içgisi awy,
Ebedi zyndanda galsa gerekdir.

Indi geldik,mömin gullar nädermiş?
Haýsy işe,haýsy ýola gidermiş?
Muhammet hatyryna ýalkaw edermiş.
Bilmeýenler muny bilse gerekdir.

Mömin gullar geçip giderler ýol dek,
Kimi ýyldyrym dek,kimisi ýel dek,
Kimi ýüwrük at dek,kimisi sil dek,
Kimi uçar guş dek geçse gerekdir.

Üç müň ýyllyk ýoldur,müňi çykyşdan,
Bir müňi henwardyr,müňi inişden,
Garadyr gijeden,ýiti gylyçdan,
Kim gije-güdizde geçse gerekdir.

Kim on günde gecer,kimi bir aýda,
Kimi gulan ýaňly kyşgyr saraýda,
Kim bir ýylda geçer,kimi kyrk aýda,
Soňy bäş müň ýylda ötse gerekdir.

Munça müň ýyl ganlar ýyglap geçensoň,
Syrat köprüsinden aňry geçensoň,
Köwser sakysyndan şerap içensoň,
Ýigit goja bir ýaşa gelse gerekdir.

Ýigitler yaşyl täç goýar başynda,
Ýusup jemalynda,Isa ýaşynda,
Dawudyň ornunda,otuz bäşinde,
Her kim öz söwdügin alsa gerekdir.

Ýetmiş hülle geýip,tagta gonarlar,
Zeberzer uýanly byrag münerler,
Iýerler,içerler,seýran kylarlar,
Ölmez ýitmez jawydan galsa gerekdir.

Ýetmiş hüýr gyz düşek düşär astyna,
Ýetmiş hüýr gol gowşyr,durar kastyna,
Tuby agaç saýa salar üstüne,
Hakyň jemalyny görse gerekdir.

"Dünýe,bu dünýe"diýr ýatan serhoşlar,
Ynanmaýann kapyr bolar, gardaşlar!
Magtymguly aýdar,geler bu işler,
Kyýamat gün gullar,görse gerekdir!!!