Ýyllar aýyrdymy?
Ýollar aýyrdy?!
Durus söýgiň "soňky duralgasynda".
"Ýalançy dünýäniň" dogruçyl gyzy
Umytlam bogýardy el aýasynda.

Wah, dözmezim!
dözäýdiňmi ýüregme,
Şeýdip ony ataýjakmy oda-da?!
Ýaşaýarkaň onuň näzik ýerinde
"Heniz aýak basylmadyk adada".

Dideleňde didarymy görýärkäm,
Özge bagty dilemändim dilimde,
Söndi ýyldyz süýnendäki arzuwym,
Kütek galam sandyraýar elimde.

Dünýä ýykylmady, dünýäm ýykyldy,
Şeýdýän eken päk arzuwlar ölende.
Yşkym dolamaga kepen ýetmedi,
Bagtymyzyň gölegçisi gelende.

Asman, zemin, tebigatam öňkülik,
Ýüregimem öňküsi deý urýardy,
Ýöne kirpikleňden gaçýan damjalar,
Ene ýere agram salyp barýardy...

Maksat ESENOW.