Ýene-de bu görnüş aňk etdi meni,
Şygryýetiň baky juwan güzeri,
Bu elwan baharyň ilkinji güni,
Hemem doglan güni Gurbannazaryň.

Ýaşyl baýyrlary ýassanyp ýatsam,
Siňsem gögüň durulygna, çuňlugna,
Döwrüm hakda uzak oýlara gitsem,
Düşünmekçi bolup özüm kimligme.

Guwanjymdan çagajyklaň päkligne,
Sadaja şolara deň boljak boldum,
Şöhrat üçinem däl,
Seniň ýoklugňa
Gynanjymdan ýaňa sen boljak boldum.

Şatlykda-gaýgyda sen boljak bolup,
Ýüregim bilniksiz gyýyldy durdy.
Söýgi-yhlasymyz gowzap-kemelip,
Şonda seň ýoklugyň duýuldy durdy.

Indi ahyn eşdip her bir ýapragyň,
Iň gamgyn şygrym durna deý düzerin.
Bu gün ýazy garşylaýar topragym,
Bu gün doglan güni Gurbannazaryň.

Ýazyň baýramynda güllere çümüp,
Ýada hem salamok gyşyň hazanyn.
Bu gün şoh baharyň ilkinji güni,
Bu gün doglan güni Gurbannazaryň.

©Sylapberdi Muhamow.