Durmuşa çykansoň gyzlar ýat bolar,
Obam, seni küýsäp ýürek ot bolar,
Seň goýnuňda ýatlara kän ýatlamam,
Jigimiň buşlugyn seçen ýerlerim,
Ejeli günlermiň geçen ýerleri.

Meýdanlaňda aýagymyň yzy bar,
Şemalyňda ýüregimiň sazy bar,
Duýga çümen on ýedimiň ýazy bar,
Käte ýanyp, käte öçen ýerlerim,
Ejeli günlermiň geçen ýerleri.

Buýra saçym gireninde örime,
Ullakan gyzmykam diýdim özüme,
Bagrym oýkap tamdyrdaky közüňe,
Ene ýabyň suwun içen ýerlerim,
Ejeli günlermiň geçen ýerleri.

Arkamy sypanda ejemiň eli,
Ylham ganatyna alypdy meni,
Kiçijek goşgulaň ullakan kemin,
Okap pelleriňde açan ýerlerim,
Ejeli günlermiň geçen ýerleri.

Adamlaram günler ýaly akyp dur,
Ýok didarlar ýüregiňi ýakyp dur,
Şükür hossar gözler ýolum bakyp dur,
Gyzyl kürte atyp göçen ýerlerim,
Ejeli günlermiň geçen ýerleri.
Gülşirin Hanowa.