Sögüň dostlar, sögmek üçin gelinýä,
Heý, sögmeseň neneňsi bor bu dünýä?!
Ýykylmasa daga bäsdeş göwünler,
Adam niçik atar şeýtana günä?!..

Oýlanyp gör içilmese araklar,
Döwülmese kellelerde çüýşeler:
"Hajy" agaň "suw çykarmaz jykyry"
Tans oýnamaz giçki toýda üýşmeleň.

Göz ýaş bolmaz hemem gökje yz galmaz,
Täze gelniň gülüp duran gözünde.
"Sen erkeksiň kimmişin ol gelmişek?"
"Içme" diýse ýaplap goýber dözümli...

Ataňdyrda sandan galan garrydyr,
Halap barmaz bitirseň bir ýumuşy.
Otuzuňdan agdyň, özüňem kaka,
Ol entegem öwredip ýör durmuşy.

Özüňem-ä şoň bilýänin bilýänsiň,
Belkem ondan bilýänsiňem has artyk.
Sen ulaldyň, adam bolduň, çaga däl
Baý, ýaňrasy çykypdyr muň ýaş artyp...

"Ejjeň..." diýip sögse sähnäniň biri,
Kem galaýma, eşdip durma ajysyn.
Tire-taýpa, babasyny, mamasyn,
Senem hyrla goşup eje, bajysyn.

Ýarty kerpiç gondur edil maňlaýna,
Sylamazlar sylatmasaň zor bilen.
Şeýle ýerde "goradygyň" ýeterlik,
Öýde bolsa eňrediber "bor" bilen...

Özi guýruk bulaýandyr onuňam,
"Asly azgyn, sende günä ýok hijem".
"Erkeklikdir, pygamberden gaýdýandyr",
Iki däl, başarsaň üçünjä tijen.

Sünnetden, kitapdan, aýat, süreden,
Nepiňe çapýany diňe şu borly.
Hemme edýä, kem galaýma hemmeden,
Her süňňüňe biri "gadymlaň borjy".

Wezipäň bar peýdalanyp gal şumat,
Özleri berýärler gaýtaryp nätjek?
Ýeke dälsiň kän seniň deý "penjekler",
Bolaýma ynsap diýp baýlykdan ätjek...

Gerek bolsa satyp goýber dostuňy,
Aklygyna doýsa garnyň bir günlük.
Sen däl, gardaş, dünýe owaldan şeýle,
Başlygyň söýüner "akytsaň kündük"...

Çagalarňa mähir bermek ne derkar,
Ýeňsesine kakda, çilime ýolla.
Nesip ýene on ýyldan, ol, är çykar,
Onsaň olam seni öýünden ýollar...

Garaz şeýdip aýlanar durar, ykbal,
Ynsan,
ynsanyň nesli.
Belkem çalynmaz sur, kyýamat gelmez...
Ynsap wägirmese entekler sesli...

6.04.2023ý. 
Edepli Gödekow. (Şahyr Gödekow)