***
Wagtyň tolkunlaryn ýassanan günler
Bagtyň kenaryna äkider seni.
Derýaň gomlarynda geljek görgüler
Söýgi joşlarymdan almazlar meni.

Mahmal kenar seni ynjytman saklar,
Özüniň iň gözel gülleri bile.
Meni hijran adasynda duşaklar,
Ýaryndan aýrylan bilbiller bile.

Lälezar kenaryň bilbilleriniň,
Nagmalary ýakym berer ýüregňe.
A meň ýaşlygymyň tez gülleriniň,
Soluşlary pygan goşar höregme.

Söýüp ýeten dünýäň mydam bitin bor,
Ýaşarsyň sen onda şa zenan deýin.
Mende ýanan ýürek, tukat durmuş bar.
Şum takdyrdan gaçyp nirä gideýin?!

Göwnüň batsa umytsyzlyk laýyna,
Näme peýda saldyr, gaýyk, kürekden.
Gyýylýaryn, ýatlamarsyň birjik-de,
Söýenimi seni örän ýürekden.

05. 05. 2020. Mary


***
Dünýäm, seni oýarmaga geldim men,
Parlap dogan al Güneşiň adyndan.
Düýnüň özem bir ugursyz ýeldim men,
Indi hergiz gitmen göwünşadyňdan.

Ýazykly men, giç gelenim bagyşla,
Saňa çenli, ölmän, ýitmän ýetenim!!!
Düýp teýkaryn dörüp, bihasap yşlaň,
Kän agtardym gündogaryň etegin.

Adam kä arzuwna gowuşman ötýär,
Gowuşybam gidýär bagty çüwende.
Emma her kes muny özüçe bilýär,
Bilşi ýalam ýaşabersin jemende.

Çünki il içinde gezip ýörşüme,
Ýegşerliberende ynammyň kaddy.
Adamlaryň arasyndan däl, seni,
Hut çogly kuýaşyň alnyndan tapdym.

Indi ikimize berlen dünýäniň,
Gündogary bolmaz, ýok günbatary.
Bir-birini aşa söýüp ýeteniň,
Gündiz bolar günleriniň hatary.

11.2019. Mary

Wepa Pirnepesow