Şahyr

Göwnühoş günleriň elinde ýaşap,
Mawy düýşleriniň düşüp ýüregne,
Ol ondan köp zatlar agtaryp ýördi,
A köp zatlaň bolsa däldi geregne.

Aýdymdaky gözel bolmak isledi,
Ýeller saçlarynyň basanda sussun,
Arzuw bilen ýaşamaklyk aňsatka,
Ony ýaşap ýören nädip unutsyn?

Bir kiçijek dünýäň uly adamsy,
Bir uly dünýäňem kiçijek gyzy
Asmandaky ýyldyzlara düşünýär,
Bir reňkdäki gündizlere düşünýär,
Adamda ýürekden gymmat näme bar?
Ýüreginden geçirmäge gorkmaýan,
Ony diňe adam üçin saklaýan,
Şol kiçijek gyza bilmez düşünmän.

Ol, belki, taryham döredip bilmez,
Belkem, öňden yza seredip bilmez,
Ýöne güller bilen gepleşip bilýän,
Ýeller bilen derrew sepleşip bilýän,
Öň birahat dünýäň gulagyn deşip,
Onuň pelsepesin pahyr hasaplap,
Hatda, şoň bilenem ekjeşip bilýän,
Gozgalaňçy gyz boljakdygy anyk.

Süleýmanyň ýüzügi deý güýji bar,
Bar zadyň diline düşünip bilýär,
Ýöne özi üçin bolup bilmeýän,
Ýöne özi üçin gülüp bilmeýän,
Adamzada ynam hakda ündeýän
Şygryn ýüreklerden geçirip görer,
Ýene ynam bilen geljege çagyr,
Çünki hemmeleriň gyzydyr söwer,
Uly dünýädäki kiçijek şahyr.

2012 ý

Bägül ATAÝEWA