Ýagyş ýagyar, uçmah ysly damjalar,
Ýagýan ýaly ýere däl-de, ýüregme.
Bilmen, hyýallarym barýar hanjaga,
"Köne ýazgylary" goýup deregne.

Ýag, gussaň melhemi, yşkyň hemdemi,
Poslan göwünleri päklige ýetir.
Senden - umyt,
Razy, galsa mendenem
Ýaşaýşy beýgeltjek ýekeje setir.

Tebigat asylky keşbine girse,
Duýgular düýpgöter barýar özgerip.
Adam ýaşamaly giçde ýa irde
Erkini olaryň eline berip.

Gurbanjemal Annakowa.



MENIŇ JUDA ÝAGŞA MEŇZÄSIM GELÝÄR

Meniñ juda ýagşa meňzäsim gelýär,
Ýagsam beýiklere, ýagsam tekize.
Topragyň süňňüne ornap serginlik,
Ýeriň ýüzi bolsa ajap, päkize.

Meniň juda ýagşa meňzäsim gelýär,
Giň sährama göwher hünji sepsedim.
Güýzde myhman bolan bahara dönüp,
Ýapraklary ýekän-ýekän öpsedim.

Meniň juda ýagşa meňzäsim gelýär,
Örülsedim sonalaryň ýelegne.
Çüwen ykballara ak pata berip,
Ýetirsemdim aşyklary dilegne.

Meniň juda ýagşa meňzäsim gelýär,
Boz ýerlerde läle bolup güllesem.
Tarlaryna monjuk ýaly düzülip,
Gül gyzlaryň saçlaryny öllesem.

Meniň juda ýagşa meňzäsim gelýär,
Çabga bolup bu zemine eňsedim.
Damjalara mährim bolup garylyp,
Ýere däl-de ýar ýüregne siňsedim.

Oguljemal ÇARYÝEWA.

"Edebiyat we sungat" gazeti, 1978 ý.


ÝAGYŞ

Ýagyş ýagýan wagtyň zemin üstüne,
Ýeriň ýüzün tämizleýäň çaňlardan.
Diňe zemini däl, meniň göwnümem,
Ýuw sen ýagyş, arassala gamlardan.

Ezilýärkäm nur astynda süllümbaý,
Ýüregimem şol nuruňdan ýuwsana.
Arassalap gursakdaky çaňlary,
Ýagyş meniň gursagyma ýagsana.

Ýagyş meniň gursagyma ýagsana,
Ondaky tupanyň diňeri ýaly.
Hemişe zemin deý, dertli ýüregmiň,
Bir pursat dynç alyp, dymary ýaly.

Gyzylgül ANNAGYLYJOWA.
Çeşme:kitaçy.ru