Men seni tapmadym, dünýäni tapdym,
Gözleň çuňlugyna çümen mahalym.
Seni mähir bilen bagryma basyp,
Ýüregiň ýüregme siňen mahaly.

Demler-deme goşulanda ilkinji,
Galpyldadyň bagdan gaçan ýaprak deý.
Seni ýowuz ýeller almasyn diýip,
Öz goýnuma saldym mele toprak deý.

Boýnuňdan ysgamda göterlip göwnüm,
Däliredim - huşum gitdi başymdan.
Aýyň ýere hemra bolşy deý şo hal,
Aýlanasym geldi seniň daşyňdan.

Sen weli uýalyp gabak astyndan,
Näz bilen ogrynça gözlerme bakdyň.
Ana şonda düşündim men bir zada,
Men seni tapmadym, dünýämi tapdym.

ÝUSUP MEREDOW
15.08.2023