Allam zikiriňe dolar zybanym,
Senden beýik bolmaz ýokdur gümanym,
Saňa uýup gazananja imanym,
Dünýäň höwesine satmaly etme.

Duçar etme naçarlaryň ahyna,
Daň nebisim sabyr atly myhyňa,
Gyzyp dünýäň haý höwesli gohuna,
Sözlerime ýalan gatmaly etme.

Yhlasyma myrat bergin oňlagyn,
Hemme bilen iki egnim deňlegin,
Namardyň öňünde başym egmegin,
Arzywlaň içinde ýitmeli etme.

Razy men eşikleň ýyrtyk ýamagna,
Halal nany ýetirseň bor damagma,
Mätäç bolup özgeleriň kömegne,
Düşeklerde hassa ýatmaly etme.

Paş bolmaýyn galmaz munda ýalanda,
Ýalňyzlyk bilinýär ýeke galaňda,
Bir gün gelip ömrüm ahyr bolanda,
Dünýeden eli boş gitmeli etme.

Süleýman Tekäýew