Günde müň gussam bar ýüz elem bilen,

Derdimiň baryndan beter garyplyk.

Soragy men boldum, gaýgy-gam bilen,

Gelip düşer hatar-hatar garyplyk.
Bürenip ýatmaga myradym ýetmez,

Günde müň kowlasam, baý ýere gitmez,

Goş basyp ,dulumda ýatar garyplyk.

Tapypdyr her ýerde ýeke-ikini,

Çekipdir byline gaýyş çekini,

Alypdyr eline daşly sokyny,

Ŷadaman , depämden urar garyplyk.



Ŷylba-ýyldan meniň müflisim çykar,

Garybyň ýüzüne kim gülüp bakar?

Ŷörişsem, ýaryşsam, göreşsem—ýykar,

Oýnasam, oýnumda utar garyplyk.



Seýr etmedim sähralarda, çöllerde,

Mestana gezmedim uly illerde,

Bir bilbildim, saýramadym güllerde,

Çag zeýnimi garar-gatar garyplyk.



Kemine diýr, geler bir gün sum ölüm,

Kimsäge—toý-baýram, kimsäge—zulum,

Gyýylma, ynjama, sabr eýle, köňlüm!

Gelipdir, bir zaman öter garyplyk.