Salam agzalar!Size bir soragym bar:Sagdyn däl adamyny söýüp bilermisiñiz? Bu soragy bermekdäki maksadym pikriñizi bilmek däl.Çünki,hemmäñiziñ biragyzdan "Ýok"diýip jogap berjekdigiñizi bilýärin.Meniñ başdaky soragym diñe giriş sözlemi.Men bu gün size döşünden aşagy ysmaýan ýigde aşyk bolan gyz hakdaky romany gürrüñ bermekçi.Bu Jojo Moyesiñ "Senden önce ben" romany.Okan romanlarymyñ arasynda iñ uly täsir galdyranlardan biri.Romanda söýgi duýgusy mümkin bolan iñ romantik dilde beýan edilýär.Hatda,hakyky söýgiñ nämedigine bu romany okaman düşünmersiñiz diýesim gelýär.
Roman Louisa Clark atly gyzyñ ofisant bolup işleýän kafesiniñ ýapylmagy bilen başlanýar. Gün-güzeranyny agyr dolaýan maşgalanyñ gyzy bolan Louisa özüne täze iş gözlenip ugraýar.Şeýlelik bilenem näsag ýigit Will Traynora seretmek maksady bilen Traynorlaryñ baý,kaşañ jaýlaryna işe alynýar.
Traynorlaryñ ýeke ogly Will Traynor baý,owadan,işewür ýigit.Onuñ her güni täze başdan geçirmelerden dolup durka,ýagyşly günleriñ birinde motosikl heläkçiligine uçraýar.Şondan soñ döşünden aşagy ysmaýan,mydama özgä mätäç bolan,barmaklarynyñ diñe bir-iki sanysyny hereket etdirip bilýän,ömrüni maýyp tigirçeginde geçirmäge mejbur bolan ynsana öwrülýär.Will şol ýagdaýda iki ýylyny geçireninden soñ Louisa Clarky oña gözegçilik etmek üçin işe alýarlar.
Will bilen Louisanyñ ilkibada jyny jyñkyryşmasa-da soñabaka olar iki ýakyn dosta öwrülýär.Williñ agyr kesellidigine garamazdan degişgenligi,alçaklygy,garşydaşyny ýañsylaýşy Louisany ýuwaş-ýuwaşdan özüne çekip ugraýar.Will Louisa ýürekgysgynç durmuşyny taşlap,täze hünärler öwrenmegi,dünýäni gezmegi maslahat berýär.Biri-biri bilen edebiýat,aýdym-saz,kino sungaty barada içgin pikir alyşýarlar.
Şeýle günleriñ birinde Louisa tötänden Williñ Dignitasa (Dignitas -özüni öldürmek isleýän adamlara añsat ölüm eçilýän ýer) gidip,ömrüni soñlandyrmak isleýändigini eşidýär.Ony bu gelen netijesinden dändirmäge synanyşýar.Onuñ üçin her dürli syýahatlary,gyzykly başdan geçirmeleri gurnaýar.Şeýle gyzykly başdan geçirmeleriñ birinde bolsa ol özüniñ Wille aşyk bolandygyna düşünip galýar.Indi Williñ ölümi Louisa üçin diñe bir dostuñy,hojaýynyñy ýitirmek däl,eýsem hakyky söýgisini-de ýitirmek boljakdy.Louisa öñküsindenem güýçli depgin bilen ony bu netijesinden dändirmäge synanyşýar.Eýsem,Louisa muny başardymyka?
Agzalar,mundan añyrsyny gürrüñ berjek däl.Sebäbi okajaklara soñuny aýtdygym bolar.Ýöne şu romany size çynym bilen maslahat berýärin.Şeýle hem "Senden önce ben" (türkçe terjimesi) ady bilen romanyñ filmi surata düşürildi.Oña-da tomaşa edip bilersiñiz.

Sözümiñ soñunda size şeýleräjik sowalym bar:Siziñ bir ýakynyñyz Williñ ýagdaýyna düşse,şeýle netijä gelse,siz ony gelen netijesinden dändirmäge synanyşarmydyñyz?Ýa-da onuñ iýjegi-içjegi we beýleki hajatlary özgä bagly bolan durmuşda ýaşanyndan ýaşamany gowy diýip,gelen netijesine hormat goýarmydyñyz?

Hormatlamak bilen @ Belki.