Bu gün sagat 15:00-da @Rigel agza bilen "Aşgabadyñ ýalkymy" söwda merkezinde duşuşdyk. Bu meniñ ilkinji gezek bir saýtdaşymy realda görşümdi. Wirtualda tanap ýören agzañy realda göreniñde dogrudanam, birbada geñ bolýan eken. @Rigel bilen herimiz bir etli döneri "ugramaly ýerine ugradanymyzdan" soñ ) söwda merkezine aýlandyk. "Älem" kitap dükanynda bizi ýakymly tötänlik garşy aldy. Dükanyñ satyjysy bolup Gülnar Geldimyradowa zähmet çekýän eken. Gülnara goşgularyny halap okaýanymy we ýazmagyny dowam etmegini aýdanymdan soñ ol "Niredesiñ Kämil okuw merkezi?!" diýip ýola düşdük. Kiçiräjik azaşmadan soñ sagat laýyk 17:00 töwereklerde (tüýs wagtynda) edebiýat agşamynyñ geçirilýän ýerine bardyk. 3-4 minut yz ýanam söhbet başlandy.
Agşamyñ bu gezekki myhmany Maksat Bäşimowyñ daşky görnüşi hakynda aýtsam, dolmuşrajyk ýüzli, sakally 1.75- 1.80 boýlarynda, 30-35 ýaşlaryndady.
Agşamyñ esasy gürrüñi Kafkaçylyk we Absürdizm hakynda boldy. Maksat Bäşimow Frans Kafkanyñ "Öwrülme" powestindäki syrlylygy öz nazaryndan düşündirmäge synanyşdy. Eseriñ esasy ideýasynyñ totalitarizm düzgüniniñ içinde ynsanyñ ruhy barlyk bolmakdan çykyp, diñe fiziki funksiýalaryny ýerine ýetirýän gurala öwrülişi, ähli zadyñ öz erkindedigine akyl ýetirip bilmeýşi hakyndadygyny mysallaryñ üsti bilen beýan etdi.
Agşama 25-30 töweregi okyjy gatnaşyp olardan esasy işjeñ gatnaşanlary Çary Ataýew we okyjylaryñ aglaba bölegini tutýan ýaş ýigitler boldy. Gyzlardan men we iki sany gyz işjeñ sorag berdi diýäýmeseñ, galany diñlemek bilen çäklendi. Men Maksat Bäşimowa eserleri hakynda soraglar berdim. "Gara goh" hekaýasynda näme diýjek bolanlygy hakdaky soragyma "Ony özüm aýtsam bolmaz" diýip jogap gaýtardy. Şu tema esasynda Çary Ataýew we Maksat Bäşimow bilen aramyzda gyzykly çekeleşik boldy. Çary aga eseriñ okyja çeýnelip berilmeli däldigi, okyjynyñ özüniñ netijä gelmelidigi hakynda durup geçse, men "çeýnelip berilýän" eserleriñem özboluşly gyzygy bardygy hakda aýtdym.
Maksat Bäşimowa türkmen ýazyjylaryndan kimleri okaýandygy hakynda soranymda olaryñ eserleriniñ orta mekdep okuwçysyna niýetlenen ýaly dilde we ideýada ýazylýandygyna ünsi çekdi...
Garaz, bu gün soñky döwürdäki iñ gyzykly wagt geçiren günlerimden biri boldy.
Aýtman geçmäýin, edebiýat agşamynyñ indiki myhmany Mukam Muhamow.