Dynç günleri ýewropada "güýçli bäşlik" çempionatlarynyň bada-bat üçüsi start alar.
Diýmek, biraz wagt futbolsyz geçiren durmuşymyz ýene ýeňişler, gözýaşlar, emosiýalar bilen bezeler.
Ilki bilen futbol watany, dumanly albion barada. Angliýa premýer-ligasyna 5-nji awgustdaky Kristal Pelas-Arsenal oýuny bilen badalga berler. Bu ýyl Ýewropa ligasyna gatnaşýan Arsenaly bu möwsümem milli çempionlyk üçin esasy dalaşgär diýip aýtmak kyn. Üstesine Zaha we onuň Kristal Pelasy öz öýünde islendik garşydaşa ýeterlik "kelle agyry" bolup bilýär. Mançester Ýunaýted tälimçilige uly umyt bilen Erik Ten Hagy bellänem bolsa, Çelsi täze eýesiniň goldamagynda uly meýilnamalar boýunça işleýänem bolsa, Arsenal Artetasy bilen esasy düzümde uly rotasiýalary ulanýanam bolsa barybir tagt üçin söweş köne tanyşlar Liwerpul bilen Mançester Sitiniň arasynda geçermikä diýýän.
Ýene bir duşuşyk 6-njy awgustda Nýukasl bilen uzak aýralykdan soň ýokary liga dolanan rowaýaty Nottingem Forest-iň arasynda geçer. Düzümine Jessi Lingardy goşan Nottingemiň arzuwlary ulurak, maksatlary ýokarrak. Taryhda Ýewropa çempionlar ligasynyň kubogyny iki gezek asmana galdyran bu toparyň oýuny köpleri gyzyklandyrýar. Klop, Gwardiola, Tuhel ägä boluň, Premýer-ligaň hakyky läheňi geldi.
Premýer-ligada ýönekeý oýunyň bolmaýandygyny göz öňünde tutup ähli oýunlar bilen tanyşdyrmagy makul gördüm. Ýagny, bu turda Fulhem-Liwerpul, Totenhem-Sautgempton, Lids-Wolwes, Bornmut-Aston Willa, Ewerton-Çelsi, Lester-Brentford, Mançester Ýunaýted-Braýton, West hem-Mançester Siti özara duşuşarlar.

"Bawariýaň bundesligasy".
Turuň 1-nji oýuny. 5-nji awgust. Aýntraht-Bawariýa.
Bu çempionatda çempion häzirden belli. Dominant Bawariýa hakyky ýyrtyjy hökmünde nobatdaky aw möwsümine taýýar. Düzümine Mane bilen De lihti goşan bu läheňiň esasy maksady Çempionlar ligasy kubogy.
Ýene bir gyzykly oýun. Borussiýa bilen Baýer Lewerkuzeniň arasynda geçer. Holand-syz galan Dortmuntlylar 6-njy awgustda uly synagdan geçerler.

"Şeýhleriň ligasy".
Fransiýa çempionatynyň 1-nji oýuny 5-nji awgustda Lion bilen Aýaççoň arasynda geçer. Bu oýunda Lion anyk faworit hökmünde görülýär.
Şeýle-de 6-njy awgustda çempion PSJ autsaýder Klermont Fud myhmany bolar. Katar dollarlaryndan düzülen ýyldyzlar topary bolan PSJ-niň oýunlaryny synlamak hemişe ýakymly.