Angliýanyň çempionatynda sanawyň lideri Çelsi myhmançylykda Nýukasly 3-0 ýeňdi. Oýunda sag gyraky goragçy Ris Jeýms 2 gezek tapawutlandy. Yzly-yzyna myhmançylykda 5 golly ýeňişler gazanan Liwerpulyň dişi öz meýdançasynda Braýtona ötmedi. 2-0 öňe saýlanan Kloppuň şägirtleri myhmanlaryň hasaby deňlemegine çäre tapyp bilmediler (2-2). Bassyr 10 oýundan bäri tapawutlanyp gelýän Mohamed Salahyň hem golly ýörişi bu oýunda soňlandy.

Tapgyryň merkezi duşuşygynda Mançester Ýunaýted myhmançylykda Tottenhamy 3-0 hasabynda ýeňlişe sezewar etdi. Ýunaýtediň gollaryny Kristiano Ronaldo, Edinson Kawani hem-de oýna soň giren Markus Reşford derwezä girizdi. Geçen tapgyrda taryhy hasap bilen utulan Ýunaýted Mançester derbisinden öň azda-kände özüni dürsemegi başardy.

Tapgyryň iň garaşylmadyk netijesi Mançester Siti-Kristal Palas duşuşygynda hasaba alyndy. Duşuşykda ýer eýeleri 2-0 hasabynda asgyn geldi. London şäheriniň wekiliniň gollaryny oýnuň başynda Zaha bilen oýnuň ahyrlarynda Gallaher geçirdi. Birinji ýarymyň ahyrynda Emerik Laporteniň gyzyl kart alandygyny belläliň. Mançester Siti şu möwsümde çempionatyň çäginde 4-nji gezek bir duşuşykda gol geçirip bilmedi.