Türkmenistan Milli ýygyndysy futbol boýunça Dünýä çempionatyna çykmak mümkinçiligini eýýäm näçinji gezek bellenilen wagtyndanam ir elden gidermegini "uly abraý" bilen dowam edip gelýär. "World Cup-2026" indi biz üçin asla amala aşmajak arzuw.
Şu gün milli ýygyndymyzy stadiondan goldap bilmeýändigime gynanyp otyrkam, ýurdumyzyň ýeke-täk "Türkmenistan sport" teleýaýlymy biziň üçin günüň iň esasy sport wakasyny däl-de başga bir "möhüm" gepleşigi efire bermegi netijesinde ýene bir gezek "persian sports" kanalynyň düşnüksiz komentatoryny diňlemäge mejbur bolduk.
"Näillow Alladdin" diýip garşy alan pars goňşularymyz bizden tapawutlylykda "goňşokara" boş gelmän eken. "Nätdi şujagaş ýeri" diýip ýekeje bolsada gol getiripdir.
Aý, "alyp utanandan, berip utandyr, aýdaýözüň" diýäýdi öýdýän goňşular.
Utuldyk, zyýany ýok, indikide utarys diýen sözler bilen eýýäm näçinji gezek özümize teselli berýäris.
Dogry, futbol diňe ýeňişlerden ybarat däl, düşünýäs, ýöne ol diňe ýeňilmekdenem ybarat dälmikä diýýän.
Haçan biz futbol oýnamany öwreneris, haçan milli ýygyndymyzyň oýnuna walidolsyz, korwalolsyz, diňe gök çaý içip tomaşa ederis. Haçan eýranlylar, özbekler, koreýler bize garşy oýnanda arkaýyn 2-nji, 3-nji sostawy bilen däl-de iň saýlama düzümi bilen aýaklary saňňyldap geler.
Bu gün biziň düzümimizde bir wagtlar super gol bilen "günüň dogýan ýurduny" gorkudan bil silkindiren, biçäre derwezebanyň entegem düýşlerine girip ýören Arslanmyrat Amanow iň ýokary baly (3.0) eýeledi.
Eýranyň düzüminde bolsa iň pes bal alan oýunçyň görkezijisi hem biziň kapitanymyzyňkydan ýokary.
Oýun barada aýdylanda bu gün erbedem oýnamadyk, ýöne gowam oýnamadyk. Mümkinçilikler boldy, peýdalanyp bilmedik. Peýdalanylmadyk mümkinçilikler goňşylarymyzda-da köp boldy.
Derwezebanymyz bir, iki gezek arassa goldan halas etdi, ýöne alaýmaly topy welin derwezesine goýberdi.
Şowsuzlykmy ýa soňsuzlykmy?
"Beýik adamlar nirede olara mätäç bolsalar şol ýerde dogulýar" diýýärler. Şu ýerde doglan Gurban Bekiýewiçi synap görmäge wagt bolmadymyka?!