Çaparman algyr ýigidi
Ahyr galla harap eder.
Çyra ýanmaz gök ýüzünde,
Degse, gülle harap eder.
Baryşsaň mert bile baryş,
Namartlardan bitmez her iş,
Neri ýörüş, aty ýaryş, —
Uzak pelle harap eder.
Almak üçin il gezer pir,
Ýyl-ýyldan nebsi güýç getir,
Her ýetenler: «Sopy men» diýr,
Gury selle harap eder.
Tebibiň bolmasa duçar,
Niçik şypa tapar bimar,
Hassa galyp biygtyýar —
Awy berip, harap eder.
Ýagşynyň bolmaz hormaty,
Ýamanyň argar kuwwaty,
Seýdi diýer, şerigaty
Niçe molla harap eder.