Hormatly Prezidentimiziň bilim ulgamyna berýän ünsi netijesinde eziz Diýarymyzyň ähli künjeklerinde häzirki zaman mekdepleriniň gurulmagy, ozaldan hereket edýän bilim ojaklarynyň iň döwrebap kompýuterler, beýleki zerur enjamlar we okuw gollanmalary bilen üpjün edilmegi, okuw işlerine ylmyň öňdebaryjy gazananlarynyň, interaktiw-multimedia hem-de sanly tehnologiýalaryň ornaşdyrylmagy özüniň ajaýyp miwelerini berýär. Muňa mekdep okuwçylarynyň dürli derejedäki ders we taslama bäsleşiklerinde gazanýan üstünlikleri anyk mysal bolup durýar.

Ahal welaýatynyň umumybilim berýän orta mekdepleriniň okuwçylary bolsa, ýurdumyzda geçirilýän «Altyn asyryň altyn zehinleri» atly ders we ylmy döredijilik bäsleşiklerinden başga-da okuw dersleri boýunça halkara onlaýn internet olimpiadalaryna yzygiderli gatnaşyp, baýrakly orunlary eýeleýärler. Okuwçy ýaşlarymyzyň Russiýa Federasiýasynyň Saratow şäherindäki «Erudit» okuw-ylmy merkezi tarapyndan geçirilýän halkara dersara onlaýn internet olimpiadasynda gazanýan üstünlikleri has-da guwandyryjydyr. Kaka etrabyndaky orta mekdepleriň okuwçylary agzalan internet olimpiadasyna 2021 — 2022-nji okuw ýylynyň birinji ýarymynda has işjeň gatnaşyp, altyn, kümüş, bürünç medallara mynasyp boldular. Şonuň bilen baglanyşykly, «Halkyň Arkadagly zamanasy» ýylynyň şu taryhy günlerinde etrabyň Medeniýet öýünde internet olimpiadasynyň ýeňijilerini sylaglamak dabarasy geçirildi.

Halkara internet olimpiadalarynyň gözükdiriji — ýolbaşçysy Araphan Erniýazowyň aýtmagyna görä, 2021 — 2022-nji okuw ýylynyň birinji ýarymynda Russiýa Federasiýasynyň Saratow şäherindäki «Erudit» okuw-ylmy merkezi tarapyndan geçirilýän halkara dersara onlaýn internet olimpiadasyna welaýatymyzyň mekdep okuwçylarynyň onlarçasy gatnaşyp, onda Kaka etrabynyň zehinli ýaşlary has ýokary görkezijileri gazandylar. Okuw ýylynyň sentýabr-oktýabr aýlarynyň jemi boýunça etrapdaky orta mekdepleriň okuwçylarynyň 29-sy baýrakly birinji orna, ýagny altyn medala mynasyp boldy. «Halkyň Arkadagly zamanasy» şygary astynda geçýän ýylyň ilkinji günlerinde olara mynasyp bolan sylaglarynyň gowşurylmagy ajaýyp waka öwrüldi.

Ýaşlarymyzda bilime çäksiz höwes bar. Şeýle bolansoň, olar özleri üçin döredilen mümkinçiliklerden netijeli peýdalanyp, bilimiň esaslaryny özleşdirýärler hem-de dürli derejedäki bäsleşiklerde zehin-başarnygyny görkezýärler. Ýaş nesliň dürli derejedäki ders, taslama, internet onlaýn dersara olimpiadalarynda yzygiderli gazanýan ajaýyp üstünlikleri milli Liderimiziň bilim ulgamyny ösdürmek we kämilleşdirmek babatdaky tagallalarynyň buýsançly miweleridir. Okuwçy ýaşlar bilime giň ýol açandygy üçin hormatly Prezidentimiziň adyna bimöçber alkyş sözlerini aýdýarlar.