Awestada ilkinji adam "Adam ata" bilen baglanşykly rowaýat hem özüne çekiji.Bu ýerde Iýim ady bilen birinji adam we onuň durmuşy hakda gürrüň berilýär.Meselem,Ahuramazda ýerdäki ösümiklere we haýwanlara seretmek üçin adamy ýaradýar we ol ýer ýüzünde gyzyl şöhle saçýan ody köpeldýär.Ahuramazda oňa altyn naýza bilen altyn gamçy sowgat berýär.Ýerdäki adamlaryň sany köpelende, Iýim altyn naýzany ýere sanjyp,hudaýdan ýeri giňeltmegi soraýar.Ahuramazada adama uly bir doňakçylygyň boljagyny öňünden habar berýär we oňa ýerdäki ösümlikleri we haýwanlary saklap galmagy tabşyrýar.Iýim uly bir öý gurup,bar bolan ähli haýwanlaryň we ösümlikleriň iň gowusyndan bir jübütini saýlap alyp,olary betbagtçylykdan alyp galýar.Emma, Iýim azgynçylyga ýol berýär we hudaýyň iýmegi gadagan eden-uly şahly haýwanyň etinden iýýärijede,ol hudaýyň gazabyna duçar bolup,ebedi ýaşamak hukugyndan mahrum edilýär.
Adamzat döwrüniň bu birinji basgançagyndan soň,ikinjisi başlanýar.Bu döwür Zarduştyň dini göreşleri bilen baglanşykly.3000 ýyllyk göreşlerden soň,Zarduşdyň neberesiniň ýolbaşçylygynda dünýäde asudalyk we parahatçylyk ýola goýulýar,erbetlik güýçleriniň tymsaly bolan döw-Ahriman ýeňilýär.
Üçünji döwürde ahyrzaman bolup geçýär.Ölüler direlip,hudaýyň garşysyna öz etmişlerinden jogap bermäge barýarlar.Hemme işlerden habarly bolan we her bir işiň hasap-hesibini ýöredýän hudaýy hiç kim aldap bilmeýär.
Zarduştçylyga görä,ölen adamyň jany üç gün bedeninde durýar,dördünji günde ol öz mähremi-perişdesiniň ýolbaşçylygynda o dünýädäki "Çinwot" atly köprüden geçmeli bolýar.Ýagşy işleri eden adamlar üçin köpri,giňelen ýagdaýda durýar.Olar ondan arkaýyn geçip,ömürleri rahatlykda geçýär,ahyrýetde ölüler direlýän günde öz bedenlerine girip ýatýarlar.Erbet işler bilen meşgullanan adamlar üçin,köpri daralyp gyl ýaly bolýar we olar jähennem azabyna duçar edilýär.