Ýekelige gol bermeklik,
Endigim goýmana geldim.
Saňa berip ýazlarymy,
Jöwzaňda köýmäne geldim.

Ýagşa aşyklygňy bilip,
Bu zeminden göge galyp,
Ýel-ýagmyrly asman bolup,
Çabgalar guýmana geldim.

Kalbymda ýaňlanýar bir heň,
Olam seniň sesiň, bilseň!
Söýginiň ezýetini hem,
Lezzet deý duýmana geldim.

Öz erkime goýman yşgym,
Däli derýa bolup daşdym,
Men bir täsin dünýä düşdüm,
Gül ýere seýrana geldim.

Bir gazal ýazyp şanyňa,
Ahyr geldim seň ýanyňa,
Bakma:n etjek gümanyňa,
Ýeke söz diýmäne geldim.
Söýmäge geldim!

YUSUP MEREDOW