Çyn dostuň aslynda şeýle bolýandyr,
Kyn günüňde saňa kömek berýändir.
Gamly wagtyň seň gaýgyňy paýlaşyp,
Şatlanaňda seň bilen deň gülýändir.

Hassakaň ýanyňda mydam dik durar,
Ejizkäň öňüňde mydam berk durar,
Saňa hormat goýar, dogan deý görer,
Çyn dostuň aslynda şeýle bolýandyr.

Gatnaşar elmydam toýdur-ýasyňa,
Uzak ömür dilär seniň ýaşyňa,
Okaýsa aladaň seniň ýüzüňden,
Derrew ýagdaý sorar geçip gaşyňa.

Saňa süýji sözi bardyr dilinde,
Ýamanlyk, göriplik ýokdur küýünde,
Adyň arşa götär iliň içinde,
Çyn dostuň aslynda şeýle bolýandyr.

Dadyňa ýetişer dag-düzden gaýdyp,
Beýgelseň magtar ol, şöhratyň aýdyp,
Ýalňyşsaň diýr: "Dost, ýalňyşma beýdip!"
Çyn dostuň aslynda şeýle bolýandyr.

Rahymberdi Suhanow