24-nji oktýabrda Özbegistanda geçirilen prezident saýlawlaryna ýurduň häzirki Prezidenti Şawkat Mirziýoýew ýeňiş gazandy. Saýlawlaryň deslapky netijelerine laýyklykda, ýurduň Prezidenti Şawkat Mirziýoýew 80,1 göterim ses alyp, bu wezipä ikinji möhlete saýlandy.



Özbegistanyň Merkezi saýlaw toparynyň habaryna görä, saýlawlara 16 million 36 müň 914 saýlawçy gatnaşypdyr. Bu bolsa, saýlawçylaryň 80,8 göteriminiň ses berendigini görkezýär. Saýlawlara 50 töweregi ýurtdan 20 töweregi halkara guramandan 1000-e golaý halkara synçy gatnaşdy. Saýlawlardaky ses bermek işi akkretirlenen 1672 ýerli we daşary ýurt habar beriş serişdeleri tarapyndan giňden beýan edildi.

Özbegistanyň Prezidenti Şawkat Mirziýoýewi saýlawlarda gazanan ynamly ýeňşi bilen Russiýanyň Prezidenti Wladimir Putin, Gazagystan Respublikasynyň Prezidenti Kasym-Žomart Tokaýew, Türkiýäniň Prezidenti Rejep Taýýip Erdogan gutlady.

Mälim bolşy ýaly, Prezident Şawkat Mirziýoýew 2016-njy ýylda geçirilen saýlawlarda ýeňiş gazanyp, ýurduň döwlet baştutany wezipesine ilkinji gezek saýlanypdy.