…Söýgäm bildiriş däl ýyrtylyp gidýän, Şäherlerde her duralga ýelmenýän.
Meňzäp barýar soňky döwür goşgular,
Otluda satylýan hilsiz haryda.
“Kapyýa bar”, “gussa bar”, bar-bar bagyrsam,
Belki çykar iki-ýeke hyrydar.
Aşa köp goşgudan aşa düşemsoň,
Az ýazmagy edinsedim ýörelge-
Ýatlamalar hesretimi dürtgüçläp,
Zol ýapsa-da gyzyp duran ýüregme.
Guzyjygyň diri soýulşy deýin,
Jan alýan bolsa-da söýgüň gussasy.
Bildirmejek borun lowlap ýansamam,
Bolmaýşy deý ojar oduň tüssesi.
Gaýta täsin-ähli dertleň tersine,
Söýgümi bukdukça hasam ýeňleýän.
…Söýgäm bildiriş däl ýyrtylyp gidýän,
Şäherlerde her duralga ýelmenýän.
Musa Ýusup.
24 ýaş.
Gyşdan soň bahar bar, baharyň soňy,
Bary bir gün, ýaşap geçýär kebelek.
Men welin bir günem ýaşamok heniz,
Ýaşym bolsa ýigrim dört ýyl tegelek.
Durmuş meňki, ömür meňki bolsa-da,
Şunça ýylyň bir güni hem meňki däl.
Satyn alan goşgy kitabym ýaly,
Kitap meňki; bir goşgusam meňki däl.
Dem almaklyk ýaşadyk däl sebäbi,
Düşünmeseň ýaşaýyşyň maňzyna.
Juda rahat, ýaşap ýörin keýpine,
Ruhdan düşmän, düşüp dünýäň yzyna.
Käte şu rahatlyk birahat edýär,
Gözlän wagtym ýitirmedik zadymy.
Hem bilemok, gözläp ýörün nämäni:
Yşk, many, pikir…ýa “adam” adyny?
Ýetir meni! Meni, ýary Ýaradan!
Gözleýänme, ýardam goluň uzat-da!
Gözleýänmi ömür boýy tapmasam,
Diýmek menden bir ömürlik uzakda.
Musa Ýusup. 05.09.2016
Yssy bakan,
Gözlerňe aşyk bolup,
Kölegesiz,
Sözleriňi söýdüm men.
Seni has öň tapyp bilmänim üçin,
Kän gezekler öz-özüme sögdüm men.
Meňki boljagyňy şol gün aňypdym,
Haýaljak gelýärkäň alowarradan.
Çünki diňe özüň däl,
Kölegäň hem owadan.
Musa Ýusup
Ruhuň joşup dursa,
Guraklykda-da,
Edil Nil ýaly.
Ýöne ýürek gugaryp galdy.
Çernobil ýaly.
Göçüp gitdi,
Ýa-da gaçyp gitdi,
Ýüregimden adamlar.
Häzir hiç kimem menden üýtgeşikdir öýdemok.
(Çünki, kitap, galam,
Indi köp öýde ýok.)
Onsaň haý-höwese,
Kynçylyklara…
Kän aýdymmy ogurlatdym.
Meň şeýle uly maksatlam bardy,
Hemmesini owratdym.
Biri galdy.
Musa Ýusup.
Ýa sen gözelleşýäñ wagt geçdigiçe,
Gyzgyn gül reñkdäki türkmen haly deý.
Ýa-da düşünjämde çuñlaşýañ her gün,
Pyragynyñ şygryndaky many deý.
****
Bu kirli dünýäniň,
Döwük eken petlesi.
Seň dury söýgiňe düşündim eje,
Ulalan günümiň ertesi.
Aglap-aglap julk boldy kalbym,
Nädip çydamaly,
Ýürek daş däl, süňk däl?!
Gözüne basyp birin-birin,
Ar alasym gelýar agladanlardan,
Bu hem ýüregme jüňk däl.
Musa Ýusup
Sen bilýänsiň suratkeş gyz,
Reňkleriň häsiýetini,
Kölegesin küýzäniň,
Gyşyň aňzagyny,
Bilýäň, güýz almasynyň
Haçan güýzänin.
Bilýänsiň martyň sähel sowukdygyn,
Simabyň suwukdygyn,
Dünýäniň ýalandygyn,
Ýüregmiň ýanandygyn,
Ýöne sen bilýän dälsiň,
Seni neneň söýýänligim.
(Degişme)
Musa Ýusup.
12комментариев
Чтобы оставить комментарий, необходимо на сайте.
