Çöle çykar bolsa, meňzär
Keýige, gulana gökleň.
Täsip edip, söweş etse,
Döner aç arslana gökleň.
Ilin, ýurdun byrakmaz,
Bela bakmaz, ýowuz ýokmaz,
Alladan emirdir, çykmaz —
Bu sözüm ýalana, gökleň.
Ylham etdi möwlam maňa,
Nazar düşdi senden ýaňa,
Ýok bolar kast eden saňa,
Gaýdyp dol Gürgene, gökleň!
Sözi agzyma hak salar,
Bir nepes aýdylan bolar,
Ýamanlyk eýleýän geler
«Nurbat» diýp, amana, gökleň!
Hyruç eýläp tursa mawir,
Permana geler Nyşapur,
Öwrüler bu döwran-döwür
Ähli musulmana, gökleň.