Aglap dünýä inýän adam diýen zat:
Onsoň agyn gülkä garyşan gerek.
Ýöne welin, gülkä garyşmak üçin
Ýurt abadan, durmuş çaglaşan gerek.

Kem-kemläp bolýaň adam diýen zat:
Onsoň sen janlara jan goşan gerek.
Ýöne welin jana jan goşmak üçin
Bagryň il-gün bilen badaşan gerek.

Käte ejiz bolýaň adam diýen zat:
Şonda gelip, derdiň soraşan gerek.
Ýöne weli, derdiň soraşmak üçin
Ozal seni dertden goraşan gerek.

Bir gün ýalňyz galýaň adam diýen zat:
Onsoň abraý bilen jaýlaşan gerek.
Ygtyýar bermersiň aglaşmak üçin
Ýöne biygtyýar aglaşan gerek.


Kerim Gurbannepesow