Goç ýigide nisbet däldir gedemlik
Şir bolsa barçadan özün kem biler
Bedasyl ýigide ýetişse beglik
Tumak baglap,hatyrasyn jem biler

Tilki,şagal inmez şiriň läşine
Çekmäge ner gerek asýa daşyna
Mert gutular her iş düşse başyna
Namart gurap.sähel işi gan biler

Doýan güni döw "taý gelmez"özüne
Boýun almaz aýbyn aýtsaň ýüzüne
Namart ýigit girmez merdiň sözüne
Mert ýigitler merdiň sözün em biler

Birnäçe ýigide salyngy düşek
Birniçeden ýegdir sygyr hem eşek
Akylla-yşarat,akmaga-kötek
Kimse dile düşer,kimse üm biler

Şabende syn et,bu-da bir zaman
Adam-adam parhy ýer bilen asman
Selmany päk bolsaň ýa kazy lukman
Mir Alyşir bolsaň gadryň kim biler?!