Ýagdaýymy soradylar,
Bir söz bilen diýdim:"Gowy"
...Hasrat tans edýär howada,
Gündizlem gijeden goýy.

Günüñ geçirmez ýagtysyn
Ýalñyzlygyñ penjiresi.
Kinniwanja umyt görse,
Hyýallarym eljireşer.

Çeke-çeke baba oýnap,
Göwnümi dartýar elemim.
Dünýämi gysyp-gowuran
Ägirt boşluga eýe men.

Çukur döräpdir ruhymda,
Kä şoña ýykylýar duýgym.
Sanarymdan geçip gitdi
Ýüregime alan urgym.

Şu günler diýseñ intizar,
Ýagdaýymdan däl-ä hoşal,
Boşlaw göwün asmanymda
Dogmazmy heý älemgoşar?

Uzaga uçup bilenok
Arzuw guşym eldeki deý.
A tozana gaplan yşgym
Bir bar,bir ýok,erteki deý.

...Ahwal,oýlar çuññur bolsa,
Ýetmez eken sözlük gory.
Bulary niçik aýdaýyn?!
Bir söz bilen diýdim:"Gowy"

Mahym Nurgeldiýewa.

22.08.2020