Belki, ýaz heseri urandyr başa,
Ezizow aýtmyşlaý, ýöne keýpine...
Salam berip gördüm şo gün ir säher
Gabat gelen ýadu-ýakyn... her kime.

Käbiri hoş bolup aldy salamym,
Gitdi käsi çiňe-çiňe çiňňere.
Nirede görenin ýatlajak bolup,
Ahmal, aňa zor salandyr birneme.

Käsi gaýtalatdy näme diýýänim,
Käsi geňler galyp bakdy yzymdan.
(Kim bilýär, ätiýaç edendir käsi
Ýanynda sülmüräp barýan gyzyndan).

Ýeri, haýran-haýran seredýäň, jigim,
Näme, senem meni tanamadyňmy?!
Bir asman, bir Ýeri paýlaşyp ýören,
Şol bir gyşy gyşlap, şu toprak üste
Şol birmeňzeş ýazy ýazlaşyp ýören
Aňmadyňmy asyl doganyňdygmy...

Adamlar, siz meni bagyşlaweriň,
Goýan bolsam serde ümüş-tamyşlyk.
Eý, Taňry salamy!
Haçandan bäri
Seniň üçin zerur boldy tanyşlyk?!.

Kakamyrat Rejebow
03.2019