Çagalarymyz çagalar bagyndan uçurym bolup gideninden soñ boşap galan toparymyzyñ kabinetine göz aýlaýaryn.Häzir bu kabineti ýeke söz bilen beýan et diýseler,uly harplar bilen
IÇGYSGYNÇ diýerdim.Dek düýnem körpeleriñ goh-galmalygyndan hyñ beren otagda häzir dymyşlyk tans oýnaýar.
Dymyşlyk bilen dynçlyk sözi aýdylyş taýdan ýakyn bolsa-da many taýdan beýle däl eken.Usulçymyz aýyñ 30-na çenli çaga kabul etmejekdigimizi aýdanda begenenem bolsam,irden işe gelenimden başlap ägirt içgysgynçlyk meni garşy aldy.Otaglarynyñ gapysynda durup, çagalary kabul edýän terbiýeçilere gözügidijilik bilen garaýaryn.
Soñam halys bolmajagyny bilip,telewizory açýaryn-da,sapak ýazgylarymy ýazmaga oturýaryn.
Bolanok.Ýüregim gysýar.
Kime jañ etmeli?
Telefonymy elime alyp,Gültäje jañ edýän.
Alanok.
Alanok.
"Gerek wagty tapdyrañog-aý,Guliçka!"diýip hüñürdeýän-de, telefony
öçürýän.
Dymyşlykdan ýadan hyýalkeş beýnim öz wezipesini ýerine ýetirýär:
"Göz öñüñe getir,häzir çagalar toparda bolan bolsady näme bolardy?"
Gözümi ýumýaryn.Hyýalymda janlandyrýaryn.
Körpeler bilen multifilmden ýadap klip görmäge oturypdyrys.Ýaýlymda Azat Dönmezowyñ "Gördüñ garyp" klibi.Men olary klipdäki wakalara gyzykdyrjak bolýaryn.
-Hana, serediñ oglanjyk gyzjagaza sowgat alypdyr.
(Aýtman geçmäýin,"oglanjyk"diýýänim öýeribermeli eşek ýaly oglan,"gyzjagaz"diýýänim başyna kürte atsañ, arkaýyn göterip biljek ýetişen gyz)
Muny görüp,klibe ürç edip tomaşa edip oturan,Ahmet sorag berýär.
-Mollum,şol sowgadyñ içinde näme bar-aý?
Ahmetiñ bilesigelijilikde özümden ozanlygyny sessiz boýun alýaryn.Içiñi ýakaýyn diýen ýaly meşhur sowgatly gutunyñ içinde näme barlygynam gőrkezmediler.
-Men näbileýin how,oñ içinde näme bardygyny?!
Soñam tans ýaryşy gurnaýas."Tans meýdançasyna"iki-üç sany oglanjygy çykaryp,tans etdirýärin.Bulary synlap oturan Medet dillenýär.
-Mollum,menem tans edäýin.
"Tans meýdançasynyñ"doludygyny göz öñünde tutup oña oñaýsyz jogap gaýtarýaryn.
-Indiki aýdymda tans edersiñ.
Birdenem,Medetiñ juda (sözüñ doly manysynda "juda") öýkelekdigi ýadyma düşüp,yza tesýärin.
-Bolýa,çykaý senem.
Bolsa-da, wagtynda ýetişipdirin.Öýkelemäge häzirlenip oturan Medet tansa çykýar.Soñam özüniñ tagaşyksyz tansyndan göwni suw içmän,öýkeläp,sapak geçenimizde we nahar iýenimizde oturýan stollarymyzyñ ýanyna gaçyp gidýär.Ýok,ýalñyş okamadyñyz.Öz başarmadyk zady üçin menden öýkeleýär Medet.Öz-özüme göwünlik berýän.
"Ýazgytda bardyr,Mahym!Ondan öýkelemese,mundan öýkelärdi."
Günortanlyk naharyndan soñ ýatyp-turupdyrys.Olar bu gün aşa hereketjeñ.Birdenem Azym maña Seýrany görkezýär
-Mollum şu "söýgülim" diýýär.
Allaniçiksi bolýan.
-Kime?
-Saña diýýär mollum.
Elim bilen kelläme "şapladýan".
"Indi-hä işiñ gaýtdygydyr".
-Aý,sen söýgülini näbilýäñ?
-Bilýän-dä.
-Bilýän bolsañ aýt,näme?
Seýran göwni bir dillenýär.
-Iki sany gyz .
Başymy ýaýkaýan.
-Aý,ýok.
Muny eşiden Ahmet elini galdyrýar.
-Men bilýän,mollum.Bir gyz,bir oglan.
Çagalaryñ şu günki samahyllamak limitini artykmajy bilen doldurandygyny göz öñünde tutup,gürrüñi başga ýana sowýaryn.
-Söýgüli bilenem işiñiz bolmasyn,pöýgili bilenem.multigimizi göreliñ.
Soñ dek düýnki uçurym dabaramyz ýadyma düşýär.Abdyllanyñ uly adam ýaly aýdan sözlerini ýatlanymda çynym bilen ýylgyrýaryn.
-Mollum,senem kraska çalynyp tanar ýaly bolmansyñ.
Çagalaryñ ählisiniñ keşpleri ýekän-ýekän göz atuwymda janlanýar.Öýkelegi,kesiri,düşbüsi,bilesigelijisi,garagoly...
Olaryñ indi hiç birini görüp bilmejegimi,göräýenimde-de çagalar bagyndaky terbiýelenýän körpeler hökmünde görüp bilmejegimi serimde aýlanymda bolsa,gözlerimden damjalar togarlanyp gaçýar-da,partamyñ üstündäki sapak ýazgysy depderimiñ üstüne damýar.

@Mümkin.