TAKWA OGRY HEM BAGBAN HAKYNDA
HEKAÝAT

Entäp ýören ogry girip bir baga,
Başlan wagty miwelerden ýolmaga.

Bagban ony görüp, gelenmiş ylgap,
Hem haýbat atypdyr, taýagyn salgap.

Gygyrypdyr ogra gataldyp sesin:
«Bagda ne görüň bar? Aşak düş basym!»

«Men – Taňry bendesi» – diýipdir ogry,
– Taňrynyň saçagna geldim men dogry.

Taňryň naz-nygmaty bu zatlaň bary,
Maňa nähak ýere berýäň azary».

Ol ogra mazaly syn edip bagban,
Aýdypdyr: «Men seniň kimdigňi aňýan.

Öňem az görmedim sen tetellini,
Edil häzir ederin men belliňi.

Meň wagtym ýok ýaňkalaşyp durmaga»,
Diýip ony başlanmyşyn urmaga.

Nadaralyk edip, gygyrýar ogry:
«Seň edýäniň näme, şeýtanyň kowmy?

Taňry bendesine berýärsiň azap,
Beýle gabahatlyk nirde görlen zat?»

«Çaky ýagşy takwasyran bolmaňam,
Ikimizem – urulýanam, urýanam.

Gitjek ýerimiz ýok – Taňry bendesi,
Baglanşykly bu zatlaryň hemmesi.

Eýsem, seniň bu ýalaňaç kebzäňi,
Saýgylaýan – Taňryň taýagy dälmi?»

Jelaleddin RUMY