GEPLÄP BILSEM, AHYRKY DEMIMDE DIÝMEKÇI ÜÇ OÝNAM SÖZÜM

Bir-biriňizden ýagşy bolsaňyz –
Gabrymda-da özge rahat küýsemen.
Haýra hossar, Şere garşy bolsaňyz –
Zyýarat şol.
Görde köýmet küýsemen.

Käte ýanyp gezdim,
Käte tüsseläp.
Käte üşäp gezdim.
Käte yssylap.
Kä belentläp uçdum, käte pessaýlap.
Öz uçusym.
Özge ganat küýsemen.

Bogulyp gezsem-de ýoluň çaňynda,
Egilip gezmedim adam öňünde.
Diňe Enem, Atam, Watan öňünde
Üç büküldim.
Aýry kysmat küýsemen.

Söýüp gördüm,
Söýlüp gördüm dünýäde,
Kesewi dek köýüp gördüm dünýäde.
Arzuw atly gaçdy. Ykbal pyýada.
Döz gelipdim.
Indem aňsat küýsemen.

Şeýdip ýöräp-ýöräp maksatly ýoldan,
Kuwwat gaçan güni ejizlän bilden,
Derman dilesem-de mähriban ilden,
Dilegçiläp
Ynsap, gaýrat küýsemen.

Biriniň ömründen kesip Ezraýyl,
Diýse: «On ýaş peşges bermäge taýyn!»
Diýerin: «Iýmändim-özgäniň paýyn,
Öz yrsgymdan başga
Owkat küýsemen!»

Bütin ömrümboýy setirler ýasap,
Almaly muzdumy etmedim hasap.
Şygrym okap.
oýurgansa naýynsap,
Muzdum şodur.
Başga hiç zat küýsemen.

Kerräk bolsa – gulak bolsam adama,
Şerräk bolsa – ýürek bolsam adama,
Gerek bolsa – kömek bolsam adama –
Öwezine
Hüşür-zekat küýsemen.

Laureat, Gahryman atly bolsanyz,
Şöhratymdyr siz şöhratly bolsanyz.
Ýöne
Adam diýen atly bolsaňyz –
Şondan beýik Abraý-şöhrat küýsemen.

Doglamda doguldym ak zada suwsap –
Ak süýde, aksakgal ussada suwsap.
Indi görüp ýörsem:
iň, ak zat – ynsap.
Ynsapdan ýokarda
Ussat küýsemen.

...Ýeri iňledip dur uruşly sowal.
Soradym toprakdan: – Niçik bor ahwal?
Diýdi: – Erkek erkek,
aýal hem aýal
Bolup bilse,
Başga myrat küýsemen!

Kerim GURBANNEPESOW
*Gosgy gysgaldylyp alyndy.